सौन्दर्यलहरी

 शिवश्शक्त्या युक्तो यदि भवति शक्तः प्रभवितञ्च
न चेदेवं देवो न खलु कुशल.स्स्पन्दितुमपि
अतस्त्वामाराध्यां हरिहरविरिञ्चादिभिरपि
प्रणन्तुं स्तोतुं वा कथमकृतपुण्यः प्रभवति।। 1।।

 तनीयांसं पांसुं तव चरणपङ्केरुहभवं
विरिञ्चि स्सञ्चिन्वन् विरचयति लोकानविकलम्
वहत्येनं शौरिः कथमपि सहस्रेण शिरसां
हर स्सङ्क्षुभ्यैनं भजति भसितोद्धूलनविधिम्।। 2।।

 अविद्यानामन्त- स्तिमिर-मिहिर- द्वीपनगरी
जडानां चैतन्यस्तबक- मकरन्द-स्रुतिझरी।
दरिद्राणां चिन्तामणिगुणनिका जन्मजलधौ
निमग्नानां दंष्ट्रा मुररिपु-वराहस्य भवती।। 3।।

 त्वदन्यः पाणिभ्यामभयवरदो दैवतगणः
त्वमेका नैवासि प्रकटित-वराभीत्यभिनया।
भयात्त्रातुं दातुं फलमपि च वांछासमधिकं
शरण्ये लोकानां तव हि चरणावेव निपुणौ।। 4।।

 हरिस्त्वामाराध्य प्रणतजनसौभाग्यजननीं
पुरा नारी भूत्वा पुररिपुमपि क्षोभमनयत्।
स्मरोपि त्वां नत्वा रतिनयनलेह्येन वपुषा
मुनीनामप्यन्तः प्रभवति हि मोहाय महताम्।। 5।।

 धनुः पौष्पं मौर्वी मधुकरमयी पञ्च विशिखाः
वसन्त स्सामन्तो मलय-मरु.दायोधनरथः।
तथाप्येक स्सर्वं हिमगिरिसुते कामपि कृपां
अपाङ्गात् ते लब्ध्वा जगदिदमनङ्गो विजयते।। 6।।

 क्वणत्काञ्चीदामा करिकलभ-कुम्भ- स्तननता
परिक्षीणा मध्ये परिणतशरच्चन्द्रवदना।
धनुर्बाणान् पाशं सृणिमपि दधाना करतलैः
पुरस्तादास्तान्नः पुरमथितु-राहोपुरुषिका।। 7।।

 सुधासिन्धोर्मध्ये सुरविटपि-वाटीपरिवृते
मणिद्वीपे नीपोपवनवति चिन्तामणिगृहे।
शिवाकारे मञ्चे परमशिवपर्यङ्कनिलयां
भजन्ति त्वां धन्याः कतिचन चिदानन्दलहरीम्।। 8।।

 महीं मूलाधारे कमपि मणिपूरे हुतवहं
स्थितं स्वाधिष्ठाने हृदि मरुत-माकाशमुपरि।
मनोपि भ्रूमध्ये सकलमपि भित्त्वा कुलपथं
सहस्रारे पद्मे सह रहसि पत्या विहरसे।। 9।।

 सुधाधारासारै- श्चरणयुगलान्तर् विगलितैः
प्रपञ्चं सिञ्चन्ती पुनरपि रसाम्नायमहसः।
अवाप्य स्वां भूमिं भुजगनिभ-मध्युष्टवलयं
स्वमात्मानं कृत्वा स्वपिषि कुलकुंडे कुहरिणि।। 10।।

 चतुर्भि श्श्रीकंठै श्शिवयुवतिभिः पञ्चभिरपि
प्रभिन्नाभि श्शम्भोर्नवभिरपि मूलप्रकृतिभिः।
चतुश्चत्वारिंशद् वसुदल-कलाश्र-त्रिवलय
त्रिरेखाभि स्सार्धं तव शरणकोणाः परिणताः।। 11।।

 त्वदीयं सौन्दर्यं तुहिनगिरिकन्ये तुलयितुं
कवीन्द्राः कल्पन्ते कथमपि विरिञ्चिप्रभृतयः।
यदालोकौत्सुक्या-दमरललना यान्ति मनसा
तपोभिर दुष्प्रापामपि गिरिश-सायुज्यपदवीम्।। 12।।

 नरं वर्षीयांसं नयनविरसं नर्मसु जडं
तवापाङ्गालोके पतित- मनुधावन्ति शतशः।
गलद्वेणीबन्धाः कुचकलश-विस्रस्तसिचया
हठात्तृट्यत्काञ्च्यो विगलितदुकूला युवतयः।। 13।।

 क्षितौ षट्पञ्चाशद् द्विसमधिकपञ्चाशदुदके
हुताशे द्वाषष्टि- श्चतुरधिक-पञ्चाशदनिले।
दिवि द्विष्षट्त्रिंशन्मनसि च चतुष्षष्टिरिति ये
मयूखास्तेषा- मप्युपरि तव पादाम्बुजयुगम्।। 14।।

 शरज्ज्योत्स्नाशुद्धां शशियुत-जटाजूटमकुटां
वरत्रासत्राणस्फटिक- घुटिका-पुस्तककराम्।
सकृन्नत्वां नत्वा कथमिव सतां सन्निदधते
मधुक्षीर- द्राक्षामधुरिम- धुरीणाः फणितयः।। 15।।

 कवीन्द्राणां चेतः कमलवन- बालातपरुचिं
भजन्ते ये सन्तः कतिचि- दरुणामेव भवतीम्।
विरिञ्चिप्रेयस्या- स्तरुणतर- शृङ्गारलहरी
गभीराभिर्वाग्भिर् विदधति सतां रंजनममी।। 16।।

 सवित्रीभिर्वाचां शशिमणि- शिलाभङ्गरुचिभिः
वशिन्याद्याभिस्त्वां सह जननि सञ्चिन्तयति यः।
स कर्ता काव्यानां भवति महतां भङ्गिरुचिभिः
वचोभिर्वाग्देवी-वदनकमला-मोदमधुरैः।। 17।।

 तनुच्चायाभिस्ते तरुणतरणिश्रीसरणिभिः
दिवं सर्वामुर्वीमरुणिमनिमग्नां स्मरति यः।
भवन्त्यस्य त्रस्यद्वनहरिणशालीननयनाः
सहोर्वश्या वश्याः कति कति न गीर्वाणगणिकाः।। 18।।

 मुखं बिन्दुं कृत्वा कुचयुग- मधस्तस्य तदधो
हरार्धं ध्यायेद्यो हरमहिषि ते मन्मथकलाम्।
स सद्य स्सङ्क्षोभं नयति वनिता इत्यतिलघु
त्रिलोकीमप्याशु भ्रमयति रवीन्दुस्तनयुगाम्।। 19।।

 किरन्तीमङ्गेभ्यः किरण निकुरम्बामृतरसं
हृदि त्वामाधत्ते हिमकर- शिलामूर्तिमिव यः।
स सर्पाणां दर्पं शमयति शकुन्ताधिप इव
ज्वरप्लुष्टान् दृष्ट्या सुखयति सुधासारसिरया।। 20।।

 तटिल्लेखातन्वीं तपनशशि- वैश्वानरमयीं
निषण्णां षण्णामप्युपरि कमलानां तव कलाम्।
महापद्माटव्यां मृदितमलमायेन मनसा
महान्तः पश्यन्तो दधति परमाह्लादलहरीम्।। 21।।

 भवानि त्वं दासे मयि वितर दृष्टिं सकरुणा-
मिति स्तोतुं वांछन् कथयति भवानि त्वमिति यः।
तदैव त्वं तस्मै दिशसि निजसायुज्यपदवीं
मुकुन्दब्रह्मेन्द्र- स्फुटमुकुट- नीराजितपदाम्।। 22।।

 त्वया हृत्वा वामं वपु-रपरितृप्तेन मनसा
शरीरार्धं शम्भो- रपरमपि शङ्के हृतमभूत्।
यदेतत्त्वद्रूपं सकलमरुणाभं त्रिनयनं
कुचाभ्यामानम्रं कुटिलशशि-चूडालमकुटम्।। 23।।

 जगत्सूते धाता हरिरवति रुद्रः क्षपयते
तिरस्कुर्वन्नेतत् स्वमपि वपु- रीशस्तिरयति।
सदापूर्व स्सर्वं तदिद - मनुगृह्णाति च शिव
स्तवाज्ञामालम्ब्य क्षणचलितयोर् भ्रूलतिकयोः।। 24।।

 त्रयाणां देवानां त्रिगुण- जनितानां तव शिवे
भवेत्पूजा पूजा तव चरणयोर्या विरचिता।
तथा हि त्वत्पादोद्वहन- मणिपीठस्य निकटे
स्थिता ह्येते शश्वन्मुकुलित करोत्तंसमकुटाः।। 25।।

 विरिञ्चिः पञ्चत्वं व्रजति हरिराप्नोति विरतिं
विनाशं कीनाशो भजति धनदो याति निधनम्।
वितन्द्री माहेन्द्री विततिरपि सम्मीलितदृशा
महासंहारेस्मिन् विहरति सति त्वत्पतिरसौ।। 26।।

 जपो जल्प श्शिल्पं सकलमपि मुद्राविरचना
गतिः प्रादक्षिण्य क्रमण मशना- द्याहुतिविधिः।
प्रणाम स्संवेश स्सुख- मखिल- मात्मार्पणदृशा
सपर्यापर्याय- स्तव भवतु यन्मे विलसितम्।। 27।।

 सुधामप्यास्वाद्य प्रतिभय- जरामृत्युहरिणीं
विपद्यन्ते विश्वे विधि- शत.मखाद्या दिविषदः।
कराळं यत्क्ष्वेडं कबलितवतः कालकलना
न शम्भोस्तन्मूलं तव जननि ताटङ्कमहिमा।। 28।।

 किरीटं वैरिञ्चं परिहर पुरः कैटभभिदः
कठोरे कोटीरे स्खलसि जहि जम्भारिमकुटम्।
प्रणम्रेष्वेतेषु प्रसभ- मुपयातस्य भवनं
भवस्याभ्युत्थाने तव परिजनोक्तिर्विजयते।। 29।।

 स्वदेहोद्भूताभिर् घृणिभि- रणिमाद्याभि-रभितो
निषेव्ये नित्ये त्वामहमिति सदा भावयति यः।
किमाश्चर्यं तस्य त्रिनयनसमृद्धिं तृणयतो
महासंवर्ताग्नि- र्विरचयति निराजनविधिम्।। 30।।

 चतुष्षष्ट्या तन्त्रै स्सकलमतिसन्धाय भुवनं
स्थितस्तत्तत् सिद्धिप्रसवपरतन्त्रैः पशुपतिः।
पुनस्त्वन्निर्बन्धा दखिलपुरुषार्थैकघटना
स्वतन्त्रं ते तन्त्रं क्षितितल- मवातीतरदिदम्।। 31।।

 शिव श्शक्तिः कामः क्षिति- रथ रवि श्शीतकिरणः
स्मरो हंस श्शक्रस्तदनु च परा मारहरयः।
अमी हृल्लेखाभि स्तिसृभि रवसानेषु घटिता
भजन्ते वर्णास्ते तव जननि नामावयवताम्।। 32।।

 स्मरं योनिं लक्ष्मीं त्रितय- मिदमादौ तव मनोर्
निधायैके नित्ये निरवधि महाभोगरसिकाः।
भजन्ति त्वां चिन्तामणि गुण- निबद्धाक्षवलयाः
शिवाग्नौ जुह्वन्त स्सुरभिघृतधाराहुतिशतैः।। 33।।

 शरीरं त्वं शम्भो श्शशि मिहिर वक्षोरुहयुगं
तवात्मानं मन्ये भगवति नवात्मानमनघम्।
अत श्शेष श्शेषीत्यय- मुभयसाधारणतया
स्थित स्सम्बन्धो वां समरस- परानन्दपरयोः।। 34।।

 मनस्त्वं व्योम त्वं मरुदसि मरुत्सारथिरसि
त्वमापस्त्वं भूमिस्त्वयि परिणतायां न हि परम्।
त्वमेव स्वात्मानं परिणमयितुं विश्ववपुषा
चिदानन्दाकारं शिवयुवति भावेन बिभृषे।। 35।।

 तवाज्ञाचक्रस्थं तपनशशि- कोटिद्युतिधरं
परं शम्भुं वन्दे परिमिलितपार्श्वं परचिता।
यमाराध्यन्भक्त्या रविशशिशुचीना मविषये
निरालोकेलोके निवसति हि भालोकभुवने।। 36।।

 विशुद्धौ ते शुद्धस्फटिकविशदं व्योमजनकं
शिवं सेवे देवीमपि शिवसमान- व्यवसिताम्।
ययोः कान्त्या यान्त्या शशिकिरण- सारूप्यसरणेर्
विधूतान्तर्ध्वान्ता विलसति चकोरीव जगती।। 37।।

 समुन्मीलत्संवित् कमलमकरन्दैकरसिकं
भजे हंसद्वन्द्वं किमपि महतां मानसचरम्।
यदालापादष्टादश- गुणितविद्यापरिणतिर्-
यदादत्ते दोषाद् गुणमखिलमद्भ्यः पय इव।। 38।।

 तव स्वाधिष्ठाने हुतवह मधिष्ठाय निरतं
तमीडे संवर्तं जननि महतीं तां च समयाम्।
यदालोके लोकान्दहति महति क्रोधकलिते
दयार्द्रा यद्दृष्टि श्शिशिर मुपचारं रचयति।। 39।।

 तटित्त्वन्तं शक्त्या तिमिरपरिपंथि-स्फुरणया
स्फुरन्नानारत्नाभरण- परिणद्धेन्द्रधनुषम्।
तव श्यामं मेघं कमपि मणिपूरैकशरणं
निषेवे वर्षन्तं हरमिहिरतप्तं त्रिभुवनम्।। 40।।

 तवाधारे मूले सह समयया लास्यपरया
नवात्मानं मन्ये नवरस- महातांडवनटम्।
उभाभ्या मेताभ्या मुदयविधि मुद्दिश्य दयया
सनाथाभ्यां जज्ञे जनकजननीम- ज्जगदिदम्।। 41।।

 गतैर्माणिक्यत्वं गगनमणिभि.स्सान्द्रघटितं
किरीटं ते हैमं हिमगिरिसुते कीर्तयति यः।
स नीडेयच्छायाच्छुरणशबलं चन्द्रशकलं
धनु श्शौनासीरं किमिति न निबध्नाति धिषणाम्।। 42।।

 धुनोतु ध्वान्तन्नस्तुलित दलितेन्दीवर- वनं
घनस्निग्धश्लक्ष्णं चिकुर-निकुरम्बं तव शिवे।
यदीयं सौरभ्यं सहज- मुपलब्धुं सुमनसो
वसन्त्यस्मिन्मन्ये वलमथनवाटीविटपिनाम्।। 43।।

 तनोतु क्षेमन्न स्तव वदन- सौन्दर्यलहरी-
परीवाह स्स्रोत स्सरणिरिव सीमन्तसरणिः।
वहन्ती सिन्दूरं प्रबल- कबरीभार- तिमिर-
द्विषां बृन्दैर् बन्दीकृतमिव नवीनार्ककिरणम्।। 44।।

 अरालै स्स्वाभाव्या दलिकलभ सश्रीभि रलकैः
परीतं ते वक्त्रं परिहसति पङ्केरुहरुचिम्।
दरस्मेरे यस्मिन् दशनरुचि किंजल्करुचिरे
सुगन्धौ माद्यन्ति स्मरदहन चक्षु र्मधुलिहः।। 45।।

 ललाटं लावण्यद्युति विमलमाभाति तव यद्
द्वितीयं तन्मन्ये मकुटघटितं चन्द्रशकलम्।
विपर्यासन्यासा दुभयमपि सम्भूय च मिथः
सुधालेप-स्यूतिः परिणमति राका हिमकरः।। 46।।

 भ्रुवौ भुग्ने किञ्चिद्भुवन- भयभङ्गव्यसनिनि
त्वदीये नेत्राभ्यां मधुकररुचिभ्यां धृतगुणम्।
धनुर्मन्ये सव्येतर-कर-गृहीतं रतिपतेः
प्रकोष्ठे मुष्टौ च स्थगयति निगूढान्तर- मुमे।। 47।।

 अह स्सूते सव्यं तव नयन मर्कात्मकतया
त्रियामां वामन्ते सृजति रजनीनायकतया।
तृतीया ते दृष्टिर् दरदलित हेमाम्बुजरुचिः
समाधत्ते सन्ध्यां दिवसनिशयो- रन्तरचरीम्।। 48।।

 विशाला कळ्याणी स्फुटरुचि- रयोध्या कुवलयैः
कृपाधाराधारा किमपि मधुरा भोगवतिका।
अवन्ती दृष्टिस्ते बहुनगर- विस्तारविजया
ध्रुवं तत्तन्नाम व्यवहरण- योग्या विजयते।। 49।।

 कवीनां सन्दर्भ स्तबक मकरन्दैकरसिकं
कटक्ष-व्याक्षेप- भ्रमरकलभौ कर्णयुगलम्।
अमुञ्चन्तौ दृष्ट्वा तव नवरसास्वादतरला-
वसूयासंसर्गा दलिकनयनं किञ्चिदरुणम्।। 50।।

 शिवे शृङ्गारार्द्रा तदितरजने कुत्सनपरा
सरोषा गङ्गायां गिरिशचरिते विस्मयवती।
हराहिभ्यो भीता सरसिरुहसौभाग्यजयिनी
सखीषु स्मेरा ते मयि जननि दृष्टि स्सकरुणा।। 51।।

 गते कर्णाभ्यर्णं गरुत इव पक्ष्माणि दधती
पुरां भेत्तुश्चित्त प्रशमरस विद्रावणफले।
इमे नेत्रे गोत्राधरपति- कुलोत्तंसकलिके
तवाकर्णाकृष्टस्मरशरविलासं कलयतः।। 52।।

 विभक्त त्रैवर्ण्यं व्यतिकरित लीलांजनतया
विभाति त्वन्नेत्र त्रितय मिद मीशानदयिते।
पुन स्स्रष्टुं देवान् द्रुहिण- हरि- रुद्रानुपरतान्
रज स्सत्त्वं बिभ्रत्तम इति गुणानां त्रयमिव।। 53।।

 पवित्रीकर्तु न्नः पशुपति पराधीनहृदये
दयामित्रै र्नेत्रै ररुणधवल- श्यामरुचिभिः।
नद श्शोणो गङ्गा तपनतनयेति ध्रुवममुं
त्रयाणां तीर्थाना मुपनयसि सम्भेद मनघम्।। 54।।

 निमेषोन्मेषाभ्यां प्रलय मुदयं याति जगती
तवेत्याहु स्सन्तो धरणिधर- राजन्यतनये।
त्वदुन्मेषाज्जातं जगदिद- मशेषं प्रलयतः
परित्रातुं शङ्के परिहृत- निमेषास्तव दृशः।। 55।।

 तवापर्णे कर्णे जपनयन- पैशुन्यचकिता
निलीयन्ते तोये नियत- मनिमेषा श्शफरिकाः।
इयं च श्रीर्बद्ध- च्छदपुट- कवाटं कुवलयं
जहाति प्रत्यूषे निशि च विघटय्य प्रविशति।। 56।।

 दृशा द्राघीयस्या दरदलित- नीलोत्पलरुचा
दवीयांसं दीनं स्नपय कृपया मामपि शिवे।
अनेनायं धन्यो भवति न च ते हानिरियता
वने वा हर्म्ये वा समकरनिपातो हिमकरः।। 57।।

 अरालं ते पालीयुगल मगराजन्यतनये
न केषामाधत्ते कुसुमशर- कोदंड- कुतुकम्।
तिरश्चीनो यत्र श्रवणपथ- मुल्लंघ्य विलस-
न्नपाङ्ग-व्यासङ्गो दिशति शरसन्धान- धिषणाम्।। 58।।

 स्फुरद्गंडाभोग- प्रतिफलित- ताटङ्कयुगळं
चतुश्चक्रं मन्ये तव मुखमिदं मन्मथरथम्।
यमारुह्य द्रुह्यत्यवनिरथ- मर्केन्दुचरणं
महावीरो मारः प्रमथपतये सज्जितवते।। 59।।

 सरस्वत्या स्सूक्ती रमृतलहरी कौशलहरीः
पिबन्त्या श्शर्वाणि श्रवणचुलुकाभ्या मविरलम्।
चमत्कार श्लाघा चलितशिरसः कुंडलगणो
झणत्कारै स्तारैः प्रतिवचन माचष्ट इव ते।। 60।।

 असौ नासावंश स्तुहिनगिरि- वंशध्वजपट
स्त्वदीयो नेदीयः फलतु फलमस्माकमुचितम्।
वहत्यन्तर्मुक्ता श्शिशिरकर- निश्वासगलितं
समृद्ध्या यस्तासां बहिरपि च मुक्तामणिधरः।। 61।।

 प्रकृत्या रक्ताया- स्तव सुदति दन्तच्छदरुचेः
प्रवक्ष्ये सादृश्यं जनयतु फलं विद्रुमलता।
न बिम्बं त्वद्बिम्ब- प्रतिफलन- रागादरुणितं
तुलामध्यारोढुं कथमिव विलज्जेत कलया।। 62।।

 स्मितज्योत्स्नाजालं तव वदनचन्द्रस्य पिबतां
चकोराणा मासी- दतिरसतया चञ्चुजडिमा।
अतस्ते शीतांशो- रमृतलहरी- माम्लरुचयः
पिबन्ति स्वच्छन्दं निशि निशि भृशं कांजिकधिया।। 63।।

 अविश्रान्तं पत्यु र्गुणगण- कथाम्रेडनजपा
जपापुष्पच्छाया तव जननि जिह्वा जयति सा।
यदग्रासीनाया.स्स्फटिकदृष- दच्छच्छविमयी
सरस्वत्या मूर्तिः परिणमति माणिक्यवपुषा।। 64।।

 रणे जित्वा दैत्या- नपहृतशिरस्त्रैः कवचिभिर्
निवृत्तै- श्चंडांश- त्रिपुरहर- निर्माल्यविमुखैः।
विशाखेन्द्रोपेन्द्रै श्शशि विशद- कर्पूरशकला
विलीयन्ते मात- स्तव वदन- ताम्बूलकबलाः।। 65।।

 विपञ्च्या गायन्ती विविध मपदानं पशुपते-
स्त्वयारब्धे वक्तुं चलितशिरसा साधुवचने।
तदीयै- र्माधुर्यै- रपलपित- तन्त्रीकलरवां
निजां वीणां वाणी निचुलयति चोलेन निभृतम्।। 66।।

 कराग्रेण स्पृष्टं तुहिनगिरिणा वत्सलतया
गिरीशेनोदस्तं मुहु- रधरपानाकुलतया।
करग्राह्यं शम्भोर् मुखमुकुरवृन्तं गिरिसुते
कथङ्कारं ब्रूम स्तव चुबुक मौपम्यरहितम्।। 67।।

 भुजाश्लेषान्नित्यं पुरदमयितुः कण्टकवती
तव ग्रीवा धत्ते मुखकमल- नालश्रियमियम्।
स्वत श्श्वेता कालागुरु बहुल- जम्बालमलिना
मृणाली लालित्यं वहति यदधो हारलतिका।। 68।।

 गले रेखास्तिस्रो गतिगमक- गीतैकनिपुणे
विवाह- व्यानद्ध- प्रगुण - गुणसंख्या- प्रतिभुवः।
विराजन्ते नानाविध- मधुर- रागाकरभुवां
त्रयाणां ग्रामाणां स्थितिनियमसीमान इव ते।। 69।।

 मृणालीमृद्वीनां तव भुजलतानां चतसृणां
चतुर्भि स्सौन्दर्यं सरसिजभव स्स्तौति वदनैः।
नखेभ्य स्सन्त्रस्यन् प्रथममथना - दन्धकरिपो-
श्चतुर्णां शीर्षाणां सम- मभय-हस्तार्पणधिया।। 70।।

 नखाना मुद्द्योतै- र्नव- नलिनरागं विहसतां
कराणां ते कान्तिं कथय कथयामः कथमुमे।
कयाचिद्वा साम्यं भजतु कलया हन्त कमलं
यदि क्रीड- ल्लक्ष्मी- चरणतल- लाक्षारसचणम्।। 71।।

 समं देवि स्कन्द- द्विपवदनपीतं स्तनयुगं
तवेदं नः खेदं हरतु सततं प्रस्नुतमुखम्।
यदालोक्याशङ्का- कुलितहृदयो हासजनकः
स्वकुम्भौ हेरम्बः परिमृशति हस्तेन झटिति।। 72।।

 अमू ते वक्षोजा- वमृतरस- माणिक्यकुतुपौ
न सन्देहस्पन्दो नगपतिपताके मनसि नः।
पिबन्तौ तौ यस्मा- दविदित- वधूसङ्गरसिकौ
कुमारावद्यापि द्विरदवदन- क्रौञ्चदलनौ।। 73।।

 वहत्यम्ब स्तम्बेरम- दनुजकुम्भप्रकृतिभिः
समारब्धां मुक्तामणिभि- रमलां हारलतिकाम्।
कुचाभोगो बिम्बाधर- रुचिभिरन्त श्शबलितां
प्रतापव्यामिश्रां पुरदमयितुः कीर्तिमिव ते।। 74।।

 तव स्तन्यं मन्ये धरणिधरकन्ये हृदयतः
पयः पारावारः परिवहति सारस्वतमिव।
दयावत्या दत्तं द्रविडशिशुरास्वाद्य तव यत्
कवीनां प्रौढाना मजनि कमनीयः कवयिता।। 75।।

 हरक्रोध- ज्वालावलिभि रवलीढेन वपुषा
गभीरे ते नाभीसरसि कृतसङ्गो मनसिजः।
समुत्तस्थौ तस्मादचलतनये धूमलतिका
जनस्तां जानीते तव जननि रोमावलिरिति।। 76।।

 यदेतत्कालिन्दी तनुतर तरङ्गाकृति शिवे
कृशे मध्ये किञ्चिज्जननि तव यद्भाति सुधियाम्।
विमर्दा दन्योन्यं कुचकलशयो रन्तरगतं
तनूभूतं व्योम प्रविशदिव नाभिं कुहरिणीम्।। 77।।

 स्थिरो गङ्गावर्त स्स्तन मुकुल रोमावळिलता
कलावालं कुंडं कुसुमशर- तेजोहुतभुजः।
रतेर्लीलागारं किमपि तव नाभिर्गिरिसुते
बिलद्वारं सिद्धेर् गिरिशनयनानां विजयते।। 78।।

 निसर्गक्षीणस्य स्तनतटभरेण क्लमजुषो
नमन्मूर्तेर् नारीतिलक शनकैस्त्रुट्यत इव।
चिरं ते मध्यस्य त्रुटिततटिनी- तीरतरुणा
समावस्थास्थेम्नो भवतु कुशलं शैलतनये।। 79।।

 कुचौ सद्य स्स्विद्यत्तट घटित- कूर्पास भिदुरौ
कषन्तौ दोर्मूले कनककलशाभौ कलयता।
तव त्रातुं भङ्गादलमिति वलग्नं तनुभुवा
त्रिधा नद्धं देवि त्रिवलि लवली वल्लिभिरिव।। 80।।

 गुरुत्वं विस्तारं क्षितिधरपतिः पार्वति निजा-
न्नितम्बा दाच्छिद्य त्वयि हरणरूपेण निदधे।
अतस्ते विस्तीर्णो गुरुरय- मशेषां वसुमतीं
नितम्बप्राग्भार स्स्थगयति लघुत्वं नयति च।। 81।।

 करीन्द्राणां शुंडान् कनक-कदली- कांडपटली-
मुभाभ्या मूरुभ्या मुभयमपि निर्जित्य भवती।
सुवृत्ताभ्यां पत्युः प्रणति- कठिनाभ्यां गिरिसुते
विधिज्ञे जानुभ्यां विबुध- करि- कुम्भद्वयमपि।। 82।।

 पराजेतुं रुद्रं द्विगुण- शरगर्भौ गिरिसुते
निषङ्गौ जंघे ते विषम विशिखो बाढमकृत।
यदग्रे दृश्यन्ते दश शरफलाः पादयुगळी-
नखाग्रच्छद्मान स्सुरमकुट शाणैकनिशिताः।। 83।।

 श्रुतीनां मूर्धानो दधति तव यौ शेखरतया
ममाप्येतौ मात श्शिरसि दयया धेहि चरणौ।
ययोः पाद्यं पाथः पशुपति- जटाजूटतटिनी
ययोर्लाक्षालक्ष्मी- ररुणहरि- चूडामणिरुचिः।। 84।।

 नमोवाकं ब्रूमो नयन रमणीयाय पदयो-
स्तवास्मै द्वन्द्वाय स्फुटरुचि- रसालक्तकवते।
असूयत्यत्यन्तं यदभिहननाय स्पृहयते
पशूना मीशानः प्रमदवन कङ्केलि तरवे।। 85।।

 मृषा कृत्वा गोत्र- स्खलन मथ वैलक्ष्यनमितं
ललाटे भर्तारं चरणकमले ताडयति ते।
चिरादन्तश्शल्यं दहनकृत मुन्मूलितवता
तुलाकोटि क्वाणैः किलिकिलित मीशानरिपुणा।। 86।।

 हिमानी हन्तव्यं हिमगिरि- निवासैकचतुरौ
निशायां निद्राणां निशि चरमभागे च विशदौ।
वरं लक्ष्मीपात्रं श्रिय मतिसृजन्तौ समयिनां
सरोजं त्वत्पादौ जननि जयत श्चित्रमिह किम्।। 87।।

 पदं ते कीर्तीनां प्रपद मपदं देवि विपदां
कथं नीतं सद्भिः कठिन कमठी कर्पर तुलाम्।
कथं वा बाहुभ्या मुपयमन काले पुरभिदा
यदादाय न्यस्तं दृषदि दयमानेन मनसा।। 88।।

 नखै र्नाक स्स्त्रीणां करकमल सङ्कोच शशिभि-
स्तरूणां दिव्यानां हसत इव ते चंडि चरणौ।
फलानि स्वस्थेभ्यः किसलय कराग्रेण ददतां
दरिद्रेभ्यो भद्रां श्रिय मनिश मह्नाय ददतौ।। 89।।

 ददाने दीनेभ्य श्श्रिय मनिश माशानु- सदृशी-
ममन्दं सौन्दर्य प्रकर- मकरन्दं विकिरति।
तवास्मिन् मन्दार- स्तबक-सुभगे यातु चरणे
निमज्जन् मज्जीवः करणचरण ष्षट्चरणताम्।। 90।।

 पदन्यास क्रीडा परिचय मिवारब्धु मनसः
स्खलन्तस्ते खेलं भवन कलहंसा न जहति।
अतस्तेषां शिक्षां सुभगमणि मंजीररणित-
च्छला- दाचक्षाणं चरणकमलं चारुचरिते।। 91।।

 गतास्ते मञ्चत्वं द्रुहिण-हरि- रुद्रेश्वरभृतः
शिव स्स्वच्छ-च्छाया-घटित-कपट-प्रच्छद-पटः।
त्वदीयानां भासां प्रतिफलन- रागारुणतया
शरीरी शृङ्गारो रस इव दृशां दोग्धि कुतुकम्।। 92।।

 अराला केशेषु प्रकृतिसरला मन्दहसिते
शिरीषाभा चित्ते दृषदुपलशोभा कुचतटे।
भृशं तन्वी मध्ये पृथु-रुरसिजा-रोहविषये
जगत्त्रातुं शम्भो र्जयति करुणा काचिदरुणा।। 93।।

 कलङ्कः कस्तूरी रजनिकर-बिम्बं जलमयं
कलाभिः कर्पूरैर् मरकतकरंडं निबिडितम्।
अतस्त्वद्भोगेन प्रतिदिनमिदं रिक्तकुहरं
विधिर्भूयो भूयो निबिडयति नूनं तव कृते।। 94।।

 पुराराते रन्तः पुरमसि ततस्त्वच्चरणयोः
सपर्यामर्यादा तरलकरणाना मसुलभा।
तथा ह्येते नीता श्शतमख-मुखा स्सिद्धिमतुलां
तव द्वारोपान्त-स्थितिभि- रणिमाद्याभि- रमराः।। 95।।

 कलत्रं वैधात्रं कति कति भजन्ते न कवयः
श्रियो देव्याः को वा न भवति पतिः कैरपि धनैः।
महादेवं हित्वा तव सति सतीना- मचरमे
कुचाभ्या- मासङ्गः कुरवक-तरो- रप्यसुलभः।। 96।।

 गिरामाहुर्देवीं द्रुहिणगृहिणी मागमविदो
हरेः पत्नीं पद्मां हरसहचरी मद्रितनयाम्।
तुरीया कापि त्वं दुरधिगम निस्सीम-महिमा
महामाया विश्वं भ्रमयसि परब्रह्ममहिषि।। 97।।

 कदा काले मातः कथय कलितालक्तकरसं
पिबेयं विद्यार्थी तव चरणनिर्णेजनजलम्।
प्रकृत्या मूकानामपि च कविता-कारणतया
यदाधत्ते वाणी मुखकमल- ताम्बूल- रसताम्।। 98।।

 सरस्वत्या लक्ष्म्या विधिहरिसपत्नो विहरते
रतेः पातिव्रत्यं शिथिलयति रम्येण वपुषा।
चिरं जीवन्नेव क्षपित-पशुपाश-व्यतिकरः
परानन्दाभिख्यं रसयति रसं त्वद्भजनवान्।। 99।।

 प्रदीपज्वालाभिर् दिवसकर- नीराजनविधिः
सुधासूतेश्चन्द्रोपलजललवै रर्घ्यरचना।
स्वकीयै रम्भोभि स्सलिलनिधि- सौहित्यकरणं
त्वदीयाभिर् वाग्भि- स्तव जननि वाचां स्तुतिरियम्।। 100।।

 समानीतः पद्भ्यां मणिमुकुरता मम्बरमणिर्
भयादन्त- स्स्तिमितकिरण- श्रेणि मसृणः।
दधाति त्वद्वक्त्रं प्रतिफलन मश्रान्तविकचं
निरातङ्कं चन्द्रा न्निजहृदय पङ्केरुहमिव।। 101।।

 समुद्भूत स्थूल स्तनभर मुर श्चारु हसितं
कटाक्षे कन्दर्पः कतिचन कदम्बद्युति वपुः।
हरस्य त्वद्भ्रान्तिं मनसि जनयामि स्म विमला
भवत्या ये भक्ताः परिणति रमीषा मिय मुमे।। 102।।

 निधे नित्यस्मेरे निरवधिगुणे नीतिनिपुणे
निराघात   नियम परचित्तैकनिलये।
नियत्या निर्मुक्ते निखिलनिगमान्त स्तुतिपदे
निरातङ्के नित्ये निगमय ममापि स्तुतिमिमाम्।। 103।।
==00==