दत्तात्रेय अष्टावधान सेवा
ऋग्वेदः – 

   योगीश्वराय मुनिमानस मन्दिराय 
   नित्यं मनो वचन कायकृताघशामे।
   ऋग्वेद पाठ कलिताञ्च सुरासुरेशे 
   दत्ताय सद्गुरुवराय विधेम सेवाम्।।   1
त्रिमूर्त्यात्मक श्रीदत्तात्रेय स्वामिन् पराक् 
   ऋग्वेद प्रिय ऋग्वेद सेवा मवधारय।
यजुर्वेदः – 

   सज्जामदग्न्य महिताध्वर याजकाय    
   सृष्टिस्थिति प्रलय यज्ञ महर्त्विजे च।
अध्वर्युवेद घनशब्द युतै र्यजुर्भिः    
   दत्ताय सद्गुरुवराय विधेम सेवाम्।।   २
त्रिमूर्त्यात्मक श्रीदत्तात्रेय स्वामिन् पराक् 
यजुर्वेद प्रिय यजुर्वेद सेवा मवधारय।
सामवेदः – 

   आशुद्ध सत्त्व परिशोभि शरीरिणेस्मै 
   नैसर्गकाश सुगुणाळिमते परेशे।
   साम्नां रहस्य सहितैश्श्रुति पेय गानैः 
   दत्ताय सद्गुरुवराय विधेम सेवाम्।।३
   त्रिमूर्त्यात्मक श्रीदत्तात्रेय स्वामिन् पराक् 
सामवेद प्रिय सामवेद सेवा मवधारय।
अथर्वण वेदः – 

   ब्रह्मण्य कर्दमसुता तनयात्रिपुत्र 
   ज्ञान क्षुधार्त चिदमत्र मुनीश वन्द्य।
   आथर्वणै श्श्रुतिवनीचित मन्त्रपुष्पैः 
   दत्ताय सद्गुरुवराय विधेम सेवाम्।।४
त्रिमूर्त्यात्मक श्रीदत्तात्रेय स्वामिन् पराक् 
अथर्ववेद प्रिय अथर्वणवेद सेवा मवधारय।

   उपनिषत् – लोकोभितो भवहुताशिनि तप्यमानो 
यस्येक्षणेन परिशामित दावतापः।
    अद्वैत बोधनपरै श्श्रुति शीर्षवाक्यैः 
   दत्ताय सद्गुरुवराय विधेम सेवाम्।।५
त्रिमूर्त्यात्मक श्रीदत्तात्रेय स्वामिन् पराक् 
उपनिषत् प्रिय उपनिषद्वाक्य सेवा मवधारय।
शास्त्रम् – 

   यस्मादृते जगति वस्त्विति विद्यते नो 
   निष्कृष्य तत्त्वमुदितं बहुधा नयोक्तैः।
   वाक्य प्रमाण पदशास्त्र वचोभिरस्मै 
   दत्ताय सद्गुरुवराय विधेम सेवाम्।।६
   त्रिमूर्त्यात्मक श्रीदत्तात्रेय स्वामिन् पराक् 
   शास्त्र प्रिय शास्त्रपठन सेवा मवधारय।
स्तोत्रम् – 

   संसेव्य पिंगलमुनि र्यमुपास्य भक्त्या 
   वापत् सनातन पदं गुरुराट्कृपाभाक्।
   स्वान्तर्विकासि नुतिपुष्प समर्पणेन 
   दत्ताय सद्गुरुवराय विधेम सेवाम्।।७
   त्रिमूर्त्यात्मक श्रीदत्तात्रेय स्वामिन् पराक् 
   स्तोत्र प्रिय स्तोत्र पठन सेवा मवधारय।

   भजनम् –  संकीर्तनापचिति कर्मकरा महान्तः 
सायुज्यमाप्य बहवो तिभवा बभूवुः। 
     वादित्र नृत्य सहितै र्विविधै स्सुगीतैः
 दत्ताय सद्गुरुवराय विधेम सेवाम्।। 8
   त्रिमूर्त्यात्मक श्रीदत्तात्रेय स्वामिन् पराक् 
   सङ्कीर्तन प्रिय संकीर्तन सेवा मवधारय।।
सङ्गीतम् -  

   यो वै विभुस्स्मरणमात्र सुतुष्ट आस्ते 
   भक्त्त्याश्रिता ननुजिघृक्षति पात्यजस्रम्।
वीणा मृदङ्ग पटहैः कल वंश गानैः 
   दत्ताय सद्गुरुवराय विधेम सेवाम्।।9
   त्रिमूर्त्यात्मक श्रीदत्तात्रेय स्वामिन् पराक् 
   सङ्गीत प्रिय सङ्गीत सेवा मवधारय।।
पञ्चाङ्गम् –

   नक्षत्र योग करणै स्तिथि वासरैश्च 
   पञ्चाङ्ग पाठनमिदं परमेश्वराय।
   कालाय ते स्मरणमात्र सुतोषणाय 
   दत्ताय सद्गुरुवराय विधेम सेवाम्।। 10
   त्रिमूर्त्यात्मक श्रीदत्तात्रेय स्वामिन् पराक्
कालात्मक पञ्चाङ्ग श्रवण सेवा मवधारय।।

   अपराध क्षमापणम् – 
   मनसा वचसा तन्वा स्माभि र्यदपराध्यते।
   क्षमस्व करुणा सिन्धो प्रसीद परमेश्वर।
==00==
श्रीदत्त तामरसस्तोत्रम्
1       हरिहर धातृ समाहृत रूपं            
जगदुपकार सुशील ममेयम्।
         गमित महाघचयं गुरु दत्त -         
प्रभुपद तामरसं भज मित्र।।
2       अपचित षोडश दिव्यसुरूपं 
बहुविध कामित दान धुरीणम्।
         गुरुपदवीधरणं गुरु दत्त- 
प्रभुपद तामरसं भज मित्र।।
3.      षडरि गणाहित दुःख विदारं          
मनसिज निग्रह दक्षमधीरम्।
         त्रिपुटविलोप पदं गुरु दत्त -          
प्रभुपद तामरसं भज मित्र।।
4.      वितत पुराण पवित्र मनोज्ञं           
दुरितचरित्र विशोधन विज्ञम्।
         अपहत पाप्मरिपुं  गुरु दत्त  -       
प्रभुपद तामरसं भज मित्र।।
5.      श्रुति हित धर्मपथानुग रक्षं           
सुकृति मनोगण संस्कृति लक्ष्यम्।
         चरम पुमर्थ हितं गुरु दत्त  -                  
प्रभुपद तामरसं भज मित्र।।
6.      अतिशुच मद्भुतलक्षणयुक्तं           
सकल चराचर वन्दनयोग्यम्।
         भवतरणाप्लवनं गुरु दत्त  -        
प्रभुपद तामरसं भज मित्र।।
7.      प्रशमित मान्तर वैरिनिकायं          
निरतिशयं मुदमिच्छसि चेत्त्वम्।
         अविदुर जागरणं गुरु दत्त  -         
प्रभुपद तामरसं भज मित्र।।
8.      घनरयिवैभवदायक मेतत्    -       
स्तवनरता ननुरक्षति नित्यम्।
         अमृतझरीस्रवणं गुरु दत्त  -                
प्रभुपद तामरसं भज मित्र।।
==00==