देव्यपराध क्षमापण स्तोत्रम् Devi Aparadha Kshamapana Stotram
ॐ 
न मन्त्रं नो यन्त्रं तदपि च न जाने स्तुतिमहो 
न चाह्वानं ध्यानं तदपि च न जाने स्तुतिकथा:।
न जाने मुद्रास्ते तदपि च न जाने विलपनं 
परं जाने मातस्त्वदनुसरणं क्लेशहरणम्॥1॥
---
विधेरज्ञानेन द्रविणविरहेणालसतया 
विधेयाशक्यत्वात्तव चरणयोर्या च्युतिरभूत्।
तदेतत् क्षन्तव्यं जननि सकलोद्धारिणि शिवे 
कुपुत्रो जायेत क्व चिदपि कुमाता न भवति॥2॥
--
पृथिव्यां पुत्रास्ते जननि बहव: सन्ति सरला: 
परं तेषां मध्ये विरलतरलोऽहं तव सुत:।
मदीयोऽयं त्याग: समुचितमिदं नो तव शिवे 
कुपुत्रो जायेत क्व चिदपि कुमाता न भवति॥3॥
--
जगन्मातर्मातस्तव चरणसेवा न रचिता 
न वा दत्तं देवि द्रविणमपि भूयस्तव मया।
तथापि त्वं स्नेहं मयि निरुपमं यत्प्रकुरुषे
कुपुत्रो जायेत क्व चिदपि कुमाता न भवति॥4॥
--
परित्यक्ता देवा विविधविधि.सेवाऽऽकुलतया 
मया पञ्चाशीतेरधिक.मपनीते तु वयसि।
इदानीं चेन्मातस्तव यदि कृपा नापि भविता 
निरालम्बो लम्बोदरजननि कं यामि शरणम्॥5॥
--
श्वपाको जल्पाको भवति मधुपाकोपमगिरा 
निरातङ्को रङ्को विहरति चिरं कोटिकनकै:।
तवाऽपर्णे कर्णे विशति मनुवर्णे फलमिदं 
जन: को जानीते जननि जपनीयं जपविधौ॥6॥
--
चिताभस्माऽऽलेपो गरलमशनं दिक्पटधरो 
जटाधारी कण्ठे भुजगपतिहारी पशुपति:।
कपाली भूतेशो भजति जगदीशैकपदवीं 
भवानि त्वत्पाणिग्रहणपरिपाटीफलमिदम्॥7॥
--
न मोक्षस्याऽऽकाङ्क्षा भवविभववाञ्छाऽपि च न मे 
न विज्ञानाऽपेक्षा शशिमुखि सुखेच्छाऽपि न पुन:।
अतस्त्वां संयाचे जननि जननं यातु मम वै 
मृडानी रुद्राणी शिव शिव भवानीति जपत:॥8॥
---
नाऽऽराधिताऽसि विधिना विविधोपचारै: 
किं रूक्षचिन्तनपरैर्न कृतं वचोभि:।
श्यामे त्वमेव यदि किञ्चन मय्यनाथे 
धत्से कृपामुचितमम्ब परं तवैव॥9॥
--
आपत्सु मग्न.स्स्मरणं त्वदीयं करोमि दुर्गे करुणार्णवे शिवे।
नैतच्छठत्वं मम भावयेथा: क्षुधातृषाऽऽर्ता जननीं स्मरन्ति॥10॥
--
जगदम्ब विचित्रमत्र किं परिपूर्णा करुणाऽस्ति चेन्मयि।
अपराधपरम्परा.परं न हि माता समुपेक्षते सुतम्॥11॥
--
मत्सम: पातकी नास्ति पापघ्नी त्वत्समा न हि।
एवं ज्ञात्वा महादेवि यथा योग्यं तथा कुरु ॥12॥
==00==